Md. Maxamed Xuseen Cismaan {Muadinka}, Agaasimaha Guud ee Wasaaradda Horumarinta Maaliyadda JSL.
Md. Maxamed Xuseen Cismaan {Muadin} waxa loo magacaabay xilkan Agaasimaha Guud ee Wasaaradda Horumarinta Maaliyadda JSL bishii January, 2023, isaga oo hore u ahaa Agaasimaha Guud ee Barnaamijka Shaqo Qaranka muddo afar sano ah, laga soo bilaabo October 2018 ilaa January 2023. Waxaanu hore u soo noqday gudoomiyaha Jaamacadda Edna Adan, isaga oo xilkaas Jaamacadda hayey intii u dhaxaysay sanadihii 2014 ilaa 2018, waxa uu sidoo kale soo noqday gudoomiyaha Jaamacadda Alpha, Hargeysa Somaliland isaga oo ahaa gudoomiyaha Alpha muddo saddex sano, mudadaas oo ah intii u dhaxaysay sanadihii 2010 ilaa 2013.
Ka hor intii aanu qaban xilalka agaasime-nimo iyo guddoomiye-nimo waxa uu soo qabatay xilal kale, isaga oo xubin ka soo noqday guddiyo badan oo ay ka mid ahaayeen Komishanka Aids-ka Qaranka Somaliland (SOLNAC), waxa uu soo noqday xoghayaha Golihii uugu horeeyey ee Wakiilada Somaliland, waxa uu la soo shaqeeyey urur caalami ah oo ka shaqeeya arimaha samo-falka, kaasi oo fadhigiisu yahay Edinburgh, Scotland magiciisana loo soo gaabiyo {VETAID} (), waxa uu soo noqday xubin ka tirsan Guddida Nabadaynta iyo Dib-u-heshiisiinta Somaliland.
Md. Maxamed Xuseen waxa uu xubin ka soo noqday oo uu la soo shaqeeyey Jimciyadda Halgamayaashii Ururkii Dhaqdhaqaaqa Somaaliyeed ee SNM ee {SOOYAAL}, isaga oo soo noqday wakhtigii uu socday halgankii dib-u-xoraynta Dalku Xoghayihii Taliskii-dhexe ee Ciidamadii SNM. Md. Maxamed Xuseen {Muadin} waxa uu kusinaan sideedtamaadka bilawgiisii ka soo shaqeeyey Warshaddii Sibidhka ee Berbera, shaqadaas oo ah tiisii uugu horaysay, waxaanu ka gaadhay Madaxa Iibka iyo Suuqgeynta Warshaddii Sibidhka Berbera.
Md. Maxamed Xuseen Cismaan {Muadin} waxa uu shahaado ka qaatay march, 2020 Jaamacadda Mekelle ee Dalka Itoobiya, isaga oo ka bartay culuumta qaanuunka, April 2010 waxa uu shahaado kale qataay Jaamacadda UCLA, taasi oo ku taala gobolka California magaalada Los Angeles ee cariga Maraykanka. August 2008 waxa uu Maxamed shahaadada labaad ee Jaamacadda ka qaatay macad caalami ah oo ka tirsan Jaamacadda Belford University USA, kaas oo la yidhaa Anderson kambaskiisa magaalada Nairobi, isaga oo ka bartay maamulka iyo ganacsiga .
Ugu danbayna waxa uu June, 2006 shahaadada kowaad ee sharciga iyo qaanuunka ka qaatay Jaamacadda Hargeysa, Somaliland.
Waxa intaa dheer, in Agaasime Maxamed Xuseen {Muadin} intii u dhaxaysay 2013 iyo 2018 uu ka tirsanaan jiray Gudiga-sare {Board} ee Macadka Nabadda iyo Horumarinta ee Somaliland ee magiciisa loo soo gaabiyo APD {Academy for Peace and Development}, intii u dhaxaysay 2015-2020 waxa uu xubin ka ahaa Ururka samo-falka ee arimaha badqabka qoyska ee SOFHA {Somaliland Family Health Association}, waxa uu soo nqoday xubin ka tirsan Golaha-Sare ee Jaamacadda Edna Adan Oct, 2018, xubin buuxda oo ka tirsan Ururka Qareenada Somaliland Oct, 2006, xubin ka mid ah Board-ka Machadka Dawladaha-Hoose ee Somaliland (LGI) Jan 2023 ilaa hadana uu ka mid yahay , January 2023 waxa uu noqday Gudoomiyaha Guddida Heer Qaran ee Maareynta Lacagaha, xilkaasi oo uu ilaa hadana hayo.
=Wabillaahi Tawfiiq=
