………………………………………………………………………………………………………………….
Berbera 09 August, 2023 {WHM}-Wasaaradda Horumarinta Maaliyada JSL ayaa ku qabatay Jaamacada Culuumta-Badda ee magaaladda Berbera kulankii Wada-tashiga Wasaaradda horumarinta Maaliyadda iyo Ururada Bulshadda Rayidka ee eek a talo-bixinta mudnaanaha Miisaaniyadda 2024-ka, kaas oo sanadkii halmar la qabto, isla markaana markii u horaysay meel caasimada Hargeysa ka baxsan lagu qabtay.
Sida uu dhigayo Xeerka Maamulka Maaliyadda Xeer Lr. 75/2016 waxa loo raacaa diyaarinta Miisaaniyadda dawladda jidwal ama kal-tirsi {Budget calendar}, iyadoo sida uu dhigayo Jadwalkaasi kulan lagala yeesho sanadkiiba halmar diyaarinta Miisaaniyadda sanadka danbe Bulshada Rayidka ah oo iyagu doorkooda ka gaysta ka talo-bixinta meelaha ay tahay in mudnaanta la siiyo marka la Odorosayo Miisaaniyadda Dawladda sanadka soo socda.
Munaasabad loo soo agaasimay ayaa lagu soo casuumay in ka badan 100 qof, kuwaas oo ka kala socday qaybaha kala duwan ee Bulshada Rayidka ah sida Ururada, Jaamacadaha, Ganacsatada, Iskaashatooyinka iyo Daneeyayaasha kale ee arimaha dhaqaalaha iyo Miisaaniyada.
Waxa dhinaca Wasaaradda kulankaas ka soo qaybgalay Wasiirka Wasaaradda Horumarinta Maaliyada JSL Dr. Sacad Cali Shire, Agaasimaha Guud Md. Maxamed Xuseen Cismaan (Mu’adinka), Maayirka Degmadda Berbera Cabdishakuur Maxamuud Cidin, Badhasaabka gobolka Saaxil Cali Cabdillahi {Cali-Case}, Xafiiska Xisaabaadka Guud iyo xubno ka mid ah Agaasimayaasha Waaxaha Wasaaradda Horumarinta Maaliyadda, iyadoo kulankaasi mudadii uu socday laysku waydaarsaday weydiimo, afkaaro iyo soo jeedimo dhaxal gal ah, kuwaas oo ka muuqan doona hadii Allaah ogolaado Miisaaniyada sanadka 2024-ka.
Kulanka madaxda sare ee Wasaaradda Horumarinta Maaliyadda JSL la yeelato ururada bulshadda rayidka ayaa ka mid ah kulamada mihiimka ah ee lagu dhiirigalinayo isla-xisaabtanka iyo daah-furnaanta.
=Wabilaahi tawfiiq=
Waaxda X/Dadweynaha iyo Xogta W.H.Maaliyadda JSL
www.slmof.org/Som.slmof.org
